Азнакай урманчылыгы белгечләре мәктәп укучылары өчен дәрес үткәрде
«Азнакай урманчылыгы» оешмасы белгечләре «Чатыртау» дәүләт тыюлыгы вәкилләре белән берлектә Азнакай шәһәренең 1нче урта мәктәбе укучылары өчен «Дәүләт тыюлыклары, хайваннар һәм үсемлекләрнең юкка чыга торган төрләре» темасына дәрес үткәрде.
Дәреснең үсеп килүче буында экологик караш һәм экологик культура тәрбияләү максатыннан үткәрелде. Бу хакта Татарстан Урман хуҗалыгы министрлыгының матбугат хезмәте хәбәр итә.
Тыюлык башлыгы Илнур Сәрвәров укучыларга тыюлыкларның әһәмияте, аларның биологик төрлелекне саклаудагы роле, сирәк һәм юкка чыккан үсемлек һәм хайван төрләре, шулай ук Татарстан Республикасының Кызыл китабы турында сөйләде.
Чатыртау кишәрлегенең урман остасы Рузилә Әхмәтвәлиева балаларны урман янгыннарының төрләре һәм сәбәпләре белән таныштырды, урманнарда янгын һәм санитар куркынычсызлык кагыйдәләре турында искәртте.