Айгөл Бариева Монреальдәге Россия консуллыгында татар ашлары пешерергә өйрәткән
Җырчы зур бәлеш һәм дучмак пешерү буенча мастер-класс үткәргән.
(Казан, 28 июнь, “Татар-информ”, Зилә Мөбәрәкшина). Канаданың Монреаль шәһәрендәге Россия Генераль консуллыгы резиденциясендә Татарстан Республикасының атказанган артисты, җырчы Айгөл Бариева татар милли ашларын әзерләү буенча мастер-класс үткәргән. Бу хакта “Татар-информ” хәбәрчесенә “Мирас” татар мәдәни үзәге җитәкчесе Зилә Миргалиева хәбәр итте.
“Чит илдә артистлар арасында милли ашлар буенча мастер-класс әле беренче генә тапкыр һәм Россия консуллыгы инициативасы белән үткәрелде. Чарада Монреальдә яшәүче һәм Генконсуллыкта эшләүче татар диаспорасы вәкилләре дә катнашты”, - диде ул.
“Мин төрле милләт кешеләре өчен милли ризыкларыбыз буенча мастер-класс уздырдым. Татарлар да, руслар да, молдованнар да, казахлар да, башкортлар да, канадалылар да бар иде. Шуңа күрә ике телдә, ә кайчакта өч телдә (татар, рус һәм инглиз) алып бардым”, - дип сөйләде Айгөл Бариева.
Җырчы сөйләвенчә, кызларның барысы да өлгер булып чыккан. “Барысын да тиз эләктерәләр, булдырдылар. Без бергәләп зур бәлеш һәм дучмаклар пешердек”, - диде ул.
“Мондый чарада катнашуым өчен “Мирас” татар мәдәни үзәгенә һәм Генераль консуллыкка рәхмәтемне белдерәм ”, - диде Айгөл Бариева.
Мастер-классны тулырак Россиянең Монреальдәге Генераль консуллыгы сәхифәсендә карарга мөмкин.