Айгөл Бариева “Үлемсез полк” акциясен әби-бабаларны онытмау чарасы дип атады
Җырчы Җиңү көне булмаса, халык тыныч тормышта яши алмас иде дип саный.
(Казан, 9 май, “Татар-информ”, Зилә Мөбәрәкшина). Татарстанның атказанган артисты Айгөл Бариева Казанда үтүче “Үлемсез полк” йөрешен сугышта катнашкан өлкән буынны онытмау чарасы булуын әйтте. Бу хакта ул “Татар-информ” хәбәрчесенә сөйләде.
“Минем өчен “Үлемсез полк” акциясе – мәңгелек хәтер. Әлеге чарада без балаларыбызга, оныкларыбызга сугышта катнашкан әби-бабаларыбызны онытмавыбызны күрсәтәбез. Җиңү көнен берничек тә онытып булмый. Без дәү әти, дәү әниләребезгә бик тә рәхмәтлебез”, - диде җырчы.
Быел Айгөл Бариева “Үлемсез полк”та икенче тапкыр гаиләсе һәм “Кызлар Пати” төркеме белән катнаша. “Барыбыз бергә җыелышып, полкка чыгарга булдык. Ул бик күркәм, матур үтә”, - диде ул.
Җырчы әтисенең әтисе – Мәсгут Бариев портретын алып чыккан. “Ул гвардиядә кече сержант булган. Бабам хәрби солдатлар төркеме белән күзгә-күз очраша, өчесен үтерә, калган өчесен пленга ала. Моның өчен аңа “Батырлык өчен медаль” тапшыралар”, - диде Айгөл Бариева.
“Яшьләр олы кешеләрне ихтирам итеп, аларга һәрвакыт рәхмәтле булып, тарихыбызны онытмыйча яшәсеннәр иде дигән теләктә калам”, - дип сөйләде җырчы.