Икътисад 6 гыйнвар 2017 13:31

Айдар Шаһимәрдәнов Россиядә мөселман эшмәкәрләре иң актив булган төбәкләрне атады

Лидерлар арасында — Татарстан һәм Дагыстан Республикалары.

Скопировать ссылку

(Казан, 6 гыйнвар, “Татар-информ”, Гөлүзә Гыймадиева). Россиянең Мөселман эшмәкәрләр ассоциациясе президенты Айдар Шаһимәрдәнов Россиянең иң актив төбәкләре дип Татарстанны һәм Дагыстанны аерып чыгарды. Бу хакта ул “Азан” радиосы оештырган тапшырудагы әңгәмәдә хәбәр итте.

“Россия Федерациясендә иң актив төбәк – ул Татарстан. Безнең ассоциация дә иң беренче шушында булдырылды. Татарстан Республикасы Президенты Рөстәм Нургали улы Миңнеханов бу эштә башкаларга этәргеч бирүдә зур көч куя. Аңа карап, эшмәкәрләр дә алга таба бара. Икенче урынга мин Төньяк Кавказдагы Дагыстан Республикасын куяр идем. Бу регион бик актив, алар көн дә ниндидер очрашулар, чаралар үткәрә. Без алар белән һәрдаим аралашып торабыз”, — ди Айдар Шаһимәрдәнов.

Аерым алганда, ул Татарстан буенча ассоциациягә бизнес проектлар белән килүче кешеләрнең күплеген искәртте. “Проектларның эчтәлеге бал, умартачылыктан башлап, ниндидер космик корабларга кадәр барып җитә. Шуңа күрә масштаблы проектлар да бар дип әйтә алам. Барлык проектларның тормышка ашырылу күләме 3-5 процентка тигез”, — ди Айдар Шаһимәрдәнов.

Аның әйтүенчә, бу проектлар нигездә авыл хуҗалыгына, төзелешкә һәм IT-технологияләргә кагыла. Иң өметле юнәлешләрнең берсе дип ул Россиядә фермерлык юнәлешен атады. “Җәмгыять бүген кирәк булган проектларны тормышка ашыра”, — диде Айдар Шаһимәрдәнов.

#Айдар Шаһимәрдәнов #проект #Татарстан #Дагыстан

Сәхифәләр

Айдар Шаһимәрдәнов Россиядә мөселман эшмәкәрләре иң актив булган төбәкләрне атады