Айдар Метшин Түбән Кама эшмәкәрләрен борчыган мәсьәләләрне атады
Казанда ТР Президенты каршындагы Эшмәкәрләр советының киңәйтелгән утырышы бара.
Скопировать ссылку
(Казан, 4 июль, "Татар-информ", Лилия Локманова). Түбән Кама районында эшмәкәрләр өчен иң катлаулы мәсьәләләр җир участокларын бүлеп бирү һәм төзелешкә рөхсәт документларын алуга бәйле. Бу хакта бүген ТР Президенты каршындагы Эшмәкәрләр советының киңәйтелгән утырышында Түбән Кама районы башлыгы, Түбән Кама шәһәре мэры Айдар Метшин белдерде.
"Бу мәсьәләне анализлап, эшкуарлыкны алып бару өчен уңай шартлар тудыра алабыз һәм тудырырга тиеш", - ди Айдар Метшин.
Түбән Камада 82 муниципаль хезмәт бунча экспрес тикшерү уздырып, аларның иң проблемалыларын ачыклаганнар. Әлеге исемлеккә 24 хезмәт кергән. "Аларның күбесе җирләрне бүлеп бирү һәм төзелешкә рөхсәт бирү документларына бәйле", - диде башлык һәм мәсьәләләрне электрон форматны файдалану күпкә нәтиҗәлерәк булуын әйтте.
Әлеге чара уникенче тапкыр уздырыла. Ул Татарстанның муниципаль районнарында эшлекле активлык белән идарә итү системасына багышлана. Утырышны республика Президенты Рөстәм Миңнеханов уздыра. Рөстәм Миңнеханов бер районда эшләнелгән регламент барлык районнарда да файдаланырга тиеш дигән йөкләмә бирде.
Эшкуарлык советы секретаре, Әлмәт районы башлыгы Тимур Нагуманов билгеләп узганча, Түбән Кама районында эшмәкәрлек өлкәсендә административ каршылыкларны бетерү буенча эш алып барыла.