Аяз Гыйләҗевнең “Мәхәббәт һәм нәфрәт турында хикәят”е төрекчәгә тәрҗемә ителгән
Фатих Кутлу язучының алты повестен төрек теленә тәрҗемә итте.
(Казан, 6 март, “Татар-информ”, Марат Мөбарәкшин). Күренекле татар язучысы Аяз Гыйләҗевнең “Мәхәббәт һәм нәфрәт турында хикәят” повесте төрек теленә тәрҗемә ителгән. Әсәрне төрек галиме һәм тәрҗемәчесе Фатих Кутлу тәрҗемә иткән. Бу хакта ул “Татар-информ” хәбәрчесенә җиткерде.
“Әле күптән түгел генә “Мәхәббәт һәм нәфрәт турында хикәят” повестен төрекчәгә тәрҗемә итеп бетердем. Шулай ук “Берәү” повестеның да тәрҗемәсе төгәлләнде. Барлыгы мин язучының алты әсәрен тәрҗемә иттем”, - диде Фатих Кутлу.
Аның сүзләренчә, бу ике әсәрне хәзер бастырып чыгарасы калган. Ләкин китапларның басылып чыгу вакытын ул әлегә төгәл генә белми.
- Фатих Кутлу Аяз Гыйләҗевның “Өч аршин җир”, “Җомга көн кич белән”, “Язгы кәрваннар”, “Яра” повестьларын төрек теленә тәрҗемә иткән. Бу әсәрләр китап булып басылып чыккан.
- Бүгенге көндә Аяз Гыйләҗевнең әсәрләре рус, венгр, телләренә дә тәрҗемә ителгән. Хәзерге вакытта төрек галиме Габделкадыйр Чәкич аның “Өч аршин җир” повестен инглиз теленә тәрҗемә итә.