Ә.Авзалова фестивале җиңүчеләре бәйге яшь талантларга иҗатта этәргеч бирә дип исәпли

(Казан, 1 июль, "Татар-информ", Ләйсән Тимерова). Әлфия Авзалова исемендәге фестиваль җиңүчеләре бәйге яшь талантларга иҗатта этәргеч бирә дип исәпли. Төрле елларда әлеге бәйгедә җиңү яулаган артистлар фикерләрен уртаклашты.

• Әлфия Авзалова исемендәге район жыр конкурсы җиңүчеләре: 2000 елда Гран При - Лилия Гыйздәтуллина, Иске Байсар, I урын - Рафак Исламов, Яңа Әлем, 2002 ел - I урын - Гөлназ Фәйрухшина, Карт авылы;  2004 ел - I урын - Рәзилә Кадыйрова, Актаныш; 2006 ел (С.Садыйкова тууына 100 ел тулуга багышлана) - I урын - Гөлчәчәк Кашапова.
• Әлфия Авзалова исемендәге регионара җыр конкурсы җиңүчеләре: 2007 ел - Гран При - Алсу Нургалиева, Актаныш, I урын - Артур Исламов; 2009 ел - Гран При - Азат Кәримов, Алабуга, I урын - Артур Исламов; 2011 ел - Гран При - Лилия Хөсәенова, Актаныш; 2013 ел - Гран При - Рәзилә Галиева, Актаныш, I урын - Илшат Хәмәдиев; 2014 ел - Гран При - Миргарифҗан Ханнанов, Мөслим.

"Әлфия Авзалова конкурсында катнашып, Гран При иясе булдым. Яшь талантларны олы иҗат юлына чыгаруда, халыкка танытуда бәйгенең әһәмияте зур. Җиңүем үземә ышанычымны арттырды, иҗатыма этәргеч бирде. Җырларыбызны халык күңеленә үтеп керерлек итеп башкару тәҗрибәсен баетуда да әһәмияте зур аның", - дип сөйләде Лилия Хөсәенова

• Әлфия Авзалова исемендәге төбакара фестиваль-бәйге 2000 елда тәүге тапкыр үткәрелгән иде. Быел ул яңа баскычка күтәрелде – халыкара бәйге буларак яшь талантларны үзенә җыйды.

Артур Исламов бәйге - яшь талантларга сәнгать дөньясына тәүге юл күрсәтүче балкыш дип исәпли. "Дөньяда төрле бәйгеләр үтә, ләкин һәммәсендә дә конкурсантларны талантына, сәләтенә карап бәяләмиләр. Ә бу конкурсның мәртәбәле жюри составы алдында баш иям. Компетентлы да, гадел дә алар. Туган ягымда шундый җырчы туу һәм шундый бәйге үтү белән горурланам. Бар катнашучыларга да уңышлар, җиңүләр телим, хыялларыгызга ышаныгыз", - диде ул. 

Рәзилә Галиеваның Әлфия Авзалова белән бер сәхнәдә җырлаганы булган. "Моның белән бик горурланам. Җырчылар өчен якты маяк ул. Үзенең моңлы, матур, яңгыравык тавышы белән бик күпләрнең күңелен яулаган шәхес. Тавышы бүгенге көндә дә колагымда яңгырап тора. Алдагы елларда бәйге районнар арасында гына үтсә, бүген ул киңрәк колач алды. Бәйгедә катнашуым, урын алуым белән сөенәм. Әзерләнгән вакытта ук репертуар туплыйсың. Үземә дә архивлардан Әлфия апаның күп кенә җырларын өйрәнергә туры килде. Үзенә генә хас репертуары җәлеп итте. Бәйге барышында башка районнардан, төбәкләрдән килгән җырчылар белән дуслаштым. Җырлаганнарын тыңлап, репертуарларын карап, зур база тупладым, үземнекен яңарттым. Әлфия апаның җырлары мәңгелек! Бәйге яшәсен, башка төбәкләрдән дә катнашсыннар. Бәйгене оештырган кешеләргә, катнашучыларга уңышлар телим", - дип сөйләде җырчы.

Буадан килгән кунаклар исеменнән мәдәният идарәсе җитәкчесе Мөдәрис Гайфуллин чыгыш ясады. "Актаныш-Буа дуслыгы, иҗади хезмәттәшлек электән дә бар иде. “Беренче мәхәббәт” җырын язучы, районыбызның мәшһүр язучысы, Муса Җәлил премиясе лауреаты Әхмәт Рәшитов, Актаныш ягына килеп, бер ханымга гашыйк булып иҗат итә аны. Аннан соң, Актаныш тәҗрибәсен өйрәнү өчен дә килдек сезгә. Татарның мәдәнияте өч киттан тора – музыка өлкәсендә Салих Сәйдәшев, шигърияттә Габдулла Тукай, ә сынлы сәнгатьтә Бакый Урманче, безнең районның Күл Черкене авылында туган. Салих Сәйдәшев - 1917 елларда Буада сәнгать мәктәбен төзүдә зур өлеш керткән шәхесләрнең берсе", - дип сөйләде ул. 

2014 елгы төбәкара бәйгедә милләтебез моңын, татар сәнгатен үстерүдәге хезмәтләрен хөрмәтләп, бәйгедә концертмейстерлык итүчеләр дә бүләкләнде: Актаныштан Инсаф Хәбибуллин, Лилия Мостафина, Буадан Илдар Нуруллин, Алабугадан “Шатлык нуры” ансамбленнән Ирина Хәлиуллина, Тукай районыннан Рәфыйкъ Дәминов, Илештән Айвар Миннегулов.

Дипломантлар, лауреатларны билгеләп үтүдән тыш, Салават Фәтхетдинов тәкъдиме белән, 2014 елда Ә. Авзалова исемендәге фестивальнең 2007 ел Гран При иясе Алсу Нургалиева истәлегенә багышланган махсус приз булдырылды. Алсуның әнисе Кадрия Идрисова гаилә исеменнән аны Актанышның яшь җырчысы Ләйсән Басыйровага тапшырды.

Алсуның әтисе Азат Нургалиев рәхмәт сүзләрен әйтте. ”Актанышта 33 ел мәдәният өлкәсендә эшләдем. Бүген мондый күләмле мәдәни чараның Актанышта үтенә гаҗәпләнеп, сокланып карап йөрим. Бик зур рәхмәт!” – диде ул.

• Быел Әлфия Авзалова исемендәге I Халыкара фестивальдә гран-при алучыга 100 мең сум биреләчәк.