«Август» компаниясе Татарстанның ике районында сөт комплексы төзиячәк
Республиканың Мөслим һәм Минзәлә районнарында һәркайсы 1,2 мең башка исәпләнгән сөт фермалары барлыкка киләчәк.
(Алабуга, 28 июнь, «Татар-информ», Диана Авакян). Мәскәүнең «Август» фирмасы Татарстанның Мөслим һәм Минзәлә районнарында сөт комплекслары төзелешенә 1,6 млрд сумга кадәр акча сала. Бу хакта «Татар-информ» мәгълүмат агентлыгы корреспондентына Татарстан авыл хуҗалыгы һәм азык-төлек министры Марат Әхмәтов хәбәр итте.
«Тагын безнең килешү бар, алар ике районда да 1,2 мең баш терлеккә сөт комплексы төзиячәк. Якынча 700-800 млн сум килеп чыга [һәркайсына]. Бу да җитди кертемнәр. Өр-яңа нәселле терлек сатып алыначак», - диде ул.
Мөслим районында проект быел гамәлгә ашырыла башлаячак, Минзәлә районында — 2020 елда.
Бүген Татарстан Республикасының «Алабуга» махсус икътисади зонасында «Август» компаниясе үсемлекләрне саклау буенча химик чаралар җитештерү заводын эшләтеп җибәрә. Чарада Татарстан Президенты Рөстәм Миңнеханов катнашачак.