Август аенда узачак «Печән базары» дизайн маркеты 4 көн дәвам итәчәк
Быел «Печән базары» дизайн маркеты 4 көн дәвам итәчәк. Чара Казанда, Кабан күле яр буенда 26-29 август көннәрендә узачак. Бу хакта Бөтендөнья татар яшьләре форумы матбугат хезмәте хәбәр итә.
Оештыручылар хәбәр итүенчә, 2025 елгы Печән базары татар йорты, аның эчке бизәлеше һәм татар көнкүреше темасына багышланачак. Шул сәбәпле, нәкъ шушы темага туры килгән әйберләргә өстенлек биреләчәк.
«Татар-информ», Владимир Васильев
Маркетта бары тик кулдан җитештергән һәм татар милли үзенчәлекләрен (айдентикасын) чагылдырган әйберләр тәкъдим ителә.
Маркет быел август аена планлаштырылган Милләт Җыены кысаларында узачак. Монда катнашучылар өчен төрле чаралар, очрашулар, остаханәләр каралган.
- Милләт Җыены быел 26-28 август көннәрендә Казан шәһәрендә узачак. Әлеге җыенга 1 мең делегат чакырылган. Милләт Җыены белән бер үк вакытта Бөтендөнья татар хатын-кызлары форумы, Бөтендөнья татар яшьләре форумы һәм Бөтенроссия татар төбәк тарихын өйрәнүчеләр җыелышын оештыру планлаштырыла.