Авариядән соң, Яшел Үзән проект-конструкторлык бюросы баш конструкторы вафат булды
Яшел Үзән проект-конструкторлык бюросы баш конструкторы Виктор Кашкин бүген төнлә хастаханәдә вафат булды. Бу хакта Яшел Үзән районы администрациясе матбугат хезмәте хәбәр итә.
Виктор Кашкин Казанда ашыгыч ярдәм машинасы белән җиңел машина бәрелешкән юл-транспорт һәлакәтеннән соң реанимациядә булган. Исегезгә төшерик, авария узган якшәмбедә Маршал Чуйков һәм Фатыйх Әмирхан урамнары киселешендә булды.
Ашыгыч ярдәм машинасының Яшел Үзәннән 7нче шәһәр хастаханәгә пациент алып барган чагы була. Бәрелешү нәтиҗәсендә ашыгыч ярдәм машинасы әйләнеп каплана.
Исегезгә төшерик, 22 ноябрьдә ТР Рәисе Рөстәм Миңнеханов Яшел Үзән проект-конструкторлык бюросының 75 еллыгы уңаеннан оешма хезмәткәрләрен бүләкләү тантанасында Виктор Кашкинга РФ Дәүләт бүләге – «Дуслык» орденын тапшырган иде.