Әтнә районы башлыгы: Безнең район — чиста авыл хуҗалыгы муниципалитеты
Бүген Әтнә районында районкүләм Сабантуй узды. Район башлыгы Габделәхәт Хәкимов бәйрәм уңаеннан тәбрикләү сүзләре җиткерде һәм муниципалитетның социаль-икътисади уңышлары хакында сөйләде.
Җитәкче әйтүенчә, Әтнә игенчеләре нәтиҗәләре Татарстанда һәр елны беренче бишлектә тора.
«Әтнә районы — чиста авыл хуҗалыгы муниципалитеты. Елның-елында игенчеләребезнең республика күләмендә беренче бишлектән төшкәннәре юк. Ә инде терлекчеләребезнең эш нәтиҗәсе — 20 елдан артык районыбыз бу өлкәдә алдынгы! Узган Авыл хуҗалыгы елында да Әтнә хуҗалыкларында һәр сыердан 11 мең 400 килограмм сөт савылды», – диде ул.
«Бүгенге көндә районыбызның социаль-икътисади хәле тотрыклы. Без бик күп дәүләт программаларында катнашабыз. Алар ярдәме белән авыл җирлекләренең яшәеше яхшыра», – диде Әтнә районы башлыгы.
Татарстан Республикасы Авыл хуҗалыгы һәм азык-төлек министрлыгы рейтингына күз салсак, агросәнәгать комплексы күрсәткечләре буенча Әтнә — 2 урында.
Милли бәйрәмнең «Кыр батыры» булып «Мәңгәр» хуҗалыгы игенчесе Айнур Сабиров танылды. Сабан туеның «Баш батыры» исеменә Радик Шакиров лаек булды.
- Әтнә районы Сабан туена бер генә дә эстрада җырчысы чакырылмаган. Аның каравы, җирле ансамбльләр һәм җырчылар сәхнә тотты.