Җәмгыять 21 август 2023 17:40

Атна ахырына Татарстанда тагын да салкынайта һәм яңгырлар көтелә

Скопировать ссылку

Татарстанда бу атнада температура түбәнәю дәвам итә, республикада яңгырлар көтелә. Татарстан Гидрометеорология үзәге шул хакта хәбәр итә.

Сишәмбе, 22 август көнне, төбәктә һава торышын антициклон дулкыны билгеләячәк, җитди явым-төшем көтелми. Төнлә һәм иртән урыны белән томан төшә. Һава температурасы төнге сәгатьләрдә 4-9 градуска кадәр (республиканың көнбатышында 12 градуска кадәр) һәм көндез 19-24 градуска кадәр җылы булачак.

Чәршәмбегә каршы төндә, 23 августта, явым-төшем ихтималы аз, әмма көндез кайбер районнарда кыска вакытлы яңгыр явачак. Тәүлекнең караңгы вакытында +4..+9 градус җылы (Татарстанның көнбатышында +13 градуска кадәр), көндез +18..+23 градус, ягъни алдагы көннән бераз салкынрак булыр дип фаразлана.

24 августта, пәнҗешәмбе көнне, көндезен кабат кыска вакытлы яңгырлар көтелә. Төньяктан искән җил аркасында салкыннар дәвам итә: төнлә бераз җылырак, +5..+10 градус, көндез +15..+20 градус.

Синоптикларның беренчел мәгълүматларына караганда, җомга, 25 августта, һәм шимбә, 26 августта, республика «циклонның арткы өлешенә, тотрыксыз һәм салкын һава массасына» эләгә. Урыны белән кыска вакытлы яңгырлар явачак. Төнлә һава температурасы +5..+10 градуска кадәр төшә. Көндез исә термометр баганалары +14..+19 градустан югары күтәрелмәячәк.

Метеорологларның алдагы декадага фаразыннан күренгәнчә, августның соңгы атнасында Татарстанда аномаль салкын була. 2023 елның 21-30 август көннәрендә һаваның уртача температурасы климат нормасыннан ике градуска түбәнрәк булачак — Татарстанда ул +16 градус тәшкил итә, ә Казанда +16,5 градус.

#Һава торышы

Сәхифәләр

Атна ахырына Татарстанда тагын да салкынайта һәм яңгырлар көтелә