Җәмгыять 19 октябрь 2005 16:46

Ашкайнату органнары чире балалар авырулары структурасында беренче урынны алып тора

Скопировать ссылку

(Казан, 19 октябрь, “Татар-информ”, Гөлнар Гаттарова). Кичә ТР Сәламәтлек саклау министрлыгының Балалар республика клиник хастаханәсендә балаларның ашау проблемасына кагылышлы “Педиатр көне” дип исемләнгән киңәшмә узды. Анда республиканың танылган галимнәре – профессор С. Мальцев, В. Булатов, медицина университеты һәм академия кафедрасы вәкилләре, Сәламәтлек саклау министрлыгы, республика районнарының төп педиатрлары һәм балалар хастаханәләре һәм сырхауханәләренең төп табиплары катнашты.

Соңгы 5 ел эчендә гастроэнтерологик авырулы балаларның шактый артуы күзәтелә. Ашкайнату органнары чире балалар авырулары структурасында беренче урынны алып тора. Ашказан-эчәк тракты чирләрен төрле сәбәпләр китереп чыгара: ашамлыкка буяу, ароматизаторлар һәм тәмләткечләр кушу, укучыларның кайнар ризыктан мәхрүм булуы, стресс факторларының артуы, халыкның материаль дәрәҗәсе түбән булу сәбәпле һәм аксым кушылган азыкны кулланмау. Нәкъ менә шушы факторлар унике илле эчәк, ашказаны асты бизе, бавыр авыруларына да китерә.

Киңәшмәдә 3 яшькә кадәр балаларның ашау тәртибенә дә игътибар бирелде. Нәниләр өчен аксым, май, углевод, витамин һәм микроэлементлы ризыкларның нисбәте дөрес булырга тиеш.

Республиканың баш балалар эндокринологы Л. Солтанованың чыгышы кызыклы булды, ул балаларның йододефицит халәтенә басым ясады. Моның белән көрәшүдә Яр Чаллы шәһәре медицина хезмәткәрләре зур көч куя, дип сөйләде.

Сәхифәләр

Ашкайнату органнары чире балалар авырулары структурасында беренче урынны алып тора