Әсгать Сәфәров пилотсыз очу аппаратларын видеога төшереп таратуны җавапсызлык дип атады
Татарстан Рәисе Аппараты җитәкчесе Әсгать Сәфәров «Татмедиа» Республика матбугат һәм массакүләм коммуникацияләр агентлыгы коллегиясенең йомгаклау утырышында пилотсыз очу аппаратларын видеога төшереп, социаль челтәрләрдә таратуны җавапсызлык дип әйтте.
«Заводларда техник яктырту җиһазларын да фотога төшереп, «янгын чыккан» дип язып, социаль челтәрләрдә тараталар. Теләсә кайсы мәгълүматны социаль челтәрләрдә чыгарганчы бу мәгълүмат кемгә ярдәм итәчәк, кешеләргә ничек йогынты ясаячак, җәмгыять өчен куркынычмы-юкмы, дигән сорау бирү мөһим. Моңа җаваплы карагыз», - дип ассызыклады Әсгать Сәфәров.
Аның әйтүенчә, социаль челтәрләрдә таралган мондый язмалар дошманга ярдәм итә, кешеләрнең тормышын куркыныч астына куя һәм республика инфраструктурасына куркыныч тудыра.