Мәдәният 23 сентябрь 2017 11:07

"Һарри Поттер" татар теленә тулысынча тәрҗемә ителеп бетәчәк – Айдар Шәйхин

“Гыйлем” проектының баш мөхәррире сүзләренчә, Һарри Поттерның соңгы өлеше татар телендә 2020 елда әзер булачак.

Скопировать ссылку

(Казан, 22 сентябрь, “Татар-информ”, Алмаз Шиһабетдинов). Һарри Поттер татар теленә тулысынча 2020 елда тәрҗемә ителеп бетәчәк. Бу хакта “Татар-информ” хәбәрчесенә “Гыйлем” проектының баш мөхәррире Айдар Шәйхин хәбәр итте.

“Китап татарчага 2020 елда тәрҗемә ителеп бетәчәк. Безгә сүгеп язган хатлар килмәде. Аерым хаталар булган, әмма аңа да карамастан укучылар канәгать. Матбугат чараларында моның белән бик нык кызыксындылар, тәрҗемә компаниясенә әйбәт кенә пиар булды. Гомумән, без бу проект аша татар телен күрә алмаган татарларны күрдек. Мин махсус күзәтү алып бардым. Төрле пабликларда татарлар һәм руслар арасында тискәре комментарий калдыручылар булды. Шул ук вакытта “Һарри Поттер”ны җылы каршы алучылар да күп иде. Мин үз эшебез белән канәгать. Шул ук вакытта, бу китап булып басылмый икән, төгәлләнеп бетмәгән эш булып саналганын аңлыйм. Шуңа бу проектның мәсьәләләренең берсе – ничек тә булса “Һарри Поттер”ның басылуына ирешү”, - дип сөйләде Айдар Шәйхин.

Бүгенге көнгә “Һарри Поттер”ның “Фәлсәфәче ташы” һәм “Һарри Поттер һәм ләгънәтле бала" әсәрләре татар теленә тәрҗемә ителгән. Аларны Интернет киңлегендә укырга була. Тәрҗемә ителәчәк өч әсәрнең исеме билгеле. Алар - “Серләр бүлмәсе”, “Феникс берлеге” һәм “Азкабан тоткыны”. Шулай ук, “Гыйлем” проекты Һарри Поттерга суббтитрлар әзерләгән. Киләчәктә, “Һарри Поттер” татар телендә дә сөйләшер дип көтелә.

Белешмә өчен: Инглиз язучысы Джоан Роулинг иҗат иткән “Гарри Поттер” фантастик романы балалар әдәбияты дөньясында иң күп укыла торган әсәрләрнең берсе. Аны кимендә дөньяның 70 теленә тәрҗемә иткәннәр. 2011 ел мәгълүматлары буенча, бу китапның 450 миллион экземпляры сатылган. Серия үзе 8 басмадан гыйбарәт.

#Һарри Поттер #Айдар Шәйхин

Сәхифәләр

"Һарри Поттер" татар теленә тулысынча тәрҗемә ителеп бетәчәк – Айдар Шәйхин