1 июньдә С.Сәйдәшев исемендәге Зур концерт залында балалар өчен хәйрия акциясе үткәрелә

(Казан, 31 май, “Татар-информ”, Миләүшә Низаметдинова). 1 июнь – Халыкара балаларны яклау көнендә Салих Сәйдәшев исемендәге Зур дәүләт концерт залында ятим, инвалид балалар, ишле гаиләләрдән булган барлыгы 1390 бала өчен хәйрия акциясе үткәрелә. Әлеге мәдәни чарада артист Сергей Безруков сәхнәдән “Маленький принц”ны Татарстан Республикасы Дәүләт симфоник оркестрына кушылып укыячак. Моннан тыш, балаларга шушы хәйрия проекты кысаларында Сергей Безруков һәм аның җәмәгате тарафыннан чыгарылган аудиоальбом-әкиятләр тапшырылачак.

Шундый ук акция быел 15 февральда Екатеринбургта үткәрелгән иде, анда Сергей Безруков Свердловск филармониясе сәхнәсеннән “Маленький принц”ны Урал академия симфоник оркестрына кушылып укыган иде, диелә Казан мэриясеннән алынган хәбәрдә.