Р.Борһанов: «Рубин»ның Киевта булган уңышсызлыгы бу юлы күзәтелмәс дип өметләник»

(Казан, 28 сентябрь, «Татар-информ», Миләүшә Низаметдинова). Бүген Казан шәһәре хакимияте җитәкчелегенең «дүшәмбе киңәшмәсе»ндә Башкарма комитет башлыгы Рәфис Борһанов кичә кич Казанга Италиядән Миланның «Интер» командасыннан 20 футболчы килүен, аның Казан «Рубин»ы белән бу атнада матч үткәрәчәген белдерде.

«Киевта булган уңышсызлык бу юлы күзәтелмәс дип өметләник, үзебезнең спортчыларга уңышлар телик», - диде ул. Бүген кичке 6 нчы яртыда исә «Үзәк стадион»да матч алды күнегүләре булачак, шулай ук Корбан Бердыев белән Жозе Моуриньо катнашында матбугат конференциясе уздыру да күздә тотыла.