Казанда ачык һавада кино күрсәтәчәкләр

 (Казан, 23 июнь, “Татар-информ”). 25 июнь көнне сәгать 21.30 да Казанның Горький исемендәге Үзәк ял паркында ачык һавада кинотеатр барлыкка киләчәк. Чара “Кинолето” проекты кысаларында оештырыла. Бу кичтә тамашачыларның “Одиноким предоставляется общежитие” фильмын карау мөмкинлеге бар.

Казан шәһәре Башкарма комитетының Мәдәният идарәсе хәбәр иткәнчә, җәй айларының һәр пәнҗешәмбе көнендә казанлыларның бушлай кино карау мөмкинлеге була. “Ретро FM” алып баручылары тамашачылар өчен күңелле бәйгеләр оештырачак һәм “Кинолето” партнерларыннан кыйммәтле бүләкләр тапшырачак.

Кино яратучылар сәгать 21.30 да 2 июльдә “Усатый нянь”, 9 июльдә “Человек с бульвара Капуцинов“, 23ендә “Мимино”, 30ында “Афоня”, аннары сәгать 20.30 да 6 августта “Кин-дза-дза”, 20 сендә “Джентльмены удачи”, 27 августта “Иван Васильевич меняет профессию” кинокартиналарын тамаша кыла алачак, диелә Казан мэриясе матбугат хезмәте хәбәрендә.