Казан милициясе Сабан туенда тәртип сакларга әзер

(Казан, 9 июнь, «Татар-информ», Миләүшә Низаметдинова.) «Казанда Сабан туе үткәрелер алдыннан, җәмәгатьчелек куркынычсызлыгын тәэмин итү максатыннан, бәйрәм уздырыласы 7 мәйданчыкны да 17 июньнән башлап саперлар һәм кинологлар тикшереп йөриячәк, ә 10 июньнән милиция хезмәткәрләре көчәйтелгән режимда эшли башлаячак», - дип белдерде Казан шәһәре эчке эшләр идарәсе җитәкчесе Алексей Селивановский бүген Казан мэриясенең «дүшәмбе киңәшмәсе»ндә.
Аның сүзләренчә, 21 июнь көнне үткәреләчәк бәйрәмдә җәмәгатьчелек тәртибен 3230 милиция хезмәткәре саклаячак. Шуларның 1200е - район бүлекләре һәм идарәләренең милиция хезмәткәрләре, 600е – Эчке эшләр министрлыгы хезмәткәрләре, 200е - Казан юридик институты курсантлары, 100ләп ТР Эчке эшләр министрлыгының уку үзәге тыңлаучысы, 400е хәрби частьтан һ.б. Ул көнне шулай ук 4 атлы патруль да кизү торачак.
«21 июньдә иртәнге 6.00 сәгатьтән җәмәгатьчелек тәртибен саклау буенча Көчләр белән идарә итү үзәге эшли башлый. Параллель рәвештә видеокүзәтү эше дә башкарыла: тәртип бозучыларны операторлар «теркәп» бара. Металлодетекторлар белән коралланган махсус җайланмаларда сугыш коралы, шартлаткыч матдәләр булу-булмауны читтән генә билгеләп тә торачаклар», - дип белдерде А.Селивановский. 
Шунысын да билгеләп үтик: күп кеше катнашкан чаралар барышында аэростат ярдәмендә видеокамераларда гомуми күзәтү эшләре башкарыла. Бу исә 5 чакрым ераклыктан, кешенең йөзе кайчак танылып бетмәсә дә, машина номерын ачык итеп күрергә мөмкинлек бирә. Дөрес, бу вакытта җилнең тизлеге секундына 25 метрдан артмаска тиеш.