Казан чәчәкләргә күмелә

12-16 май көннәрендә башкалада чәчәкләр һәм ландшафт дизайнына багышланган IX махсуслаштырылган күргәзмә узачак
(Казан, 9 май, “Татар-инофрм”). 12 майда “Казан ярминкәсе”ндә чәчәкләр күргәзмәсе ачыла. “Чәчәкләр палитрасы” дип исемләнгән әлеге традицион чараны Россия флористлар ассоциациясе ТР Сәнәгать һәм сәүдә, Төзелеш, архитектура һәм торак-коммуналь хуҗалыгы министрлыклары, Казан мэриясе ярдәмендә инде тугызынчы тапкыр оештыра.

“Казан ярминкәсе”ннән хәбәр итүләренчә, төсләргә гаять бай булган бу күргәзмә ел саен 10 меңнән артык профессиональ һәм үзешчән бакчачы, ладшафт дизайны, флористика, фитодизайн белән шөгыльләнүчене үзенә җыя. Бакча сезоны ачылуга туры китереп уздырылучы әлеге күргәзмә бирегә килүчеләрне бакча эшләре өчен кирәк-яраклар, үсентеләр, шәһәр янындагы йортларны бизәкләү материалларын, шулай ук бүлмә гөлләре белән тәэмин итәргә булыша.
Быел күргәзмәдә Россия шәһәрләренең 100 дән артык компаниясе катнашырга теләк белдергән. Магнитогорскиның “Виктория”, Мәскәүнең “Бизнес букет” сәүдә йортлары, Самараның “Игенчелек үзәге”, Пенза өлкәсенең “Мокшанский” теплица хуҗалыгы”, Казанның “Нокса” бакча үзәге”, “Богородский розалары” предприятиесе - шуларның кайберләре. Катнашучылар арасында чәчәкләр иле Голландиянең “Enigma Flowers Ltd” компаниясе дә бар. Ул күргәзмәгә хризантемалар, лилия, гербера, розаларның яңа сортларын, бүлмә гөлләренең киң ассортиментын алып киләчәк.
Заманча флористиканы популярлаштыру һәм флористларның һөнәри осталыкларын күтәрү максатыннан, 12-13 май көннәрендә күргәзмә кысаларында “Шәһәр һәм чәчәкләр” дигән ачык конкурс уздырыла. Флористларның эшләренә Россия флоритлары ассоцияциясе президенты Валентина Сафронова җитәкчелегендәге жюри бәя бирәчәк. “Язгы сюрприз” дигән V Республика мода фестивале “Чәчәкләр палитрасы”ның тагын бер кызыклы чарасы булыр дип көтелә.