Казанда яшәгән 26 Советлар Союзы Героеның бүген нибары 3се генә исән

(Казан, 5 май, «Татар-информ», Миләүшә Низаметдинова). Хәзерге вакытта Казанда 44588 Бөек Ватан сугышы ветераны гомер итә. Шуларның 5223е – Бөек Ватан сугышында катнашкан: аларның 1291е сугыш инвалиды, 264е – камалыштагы Ленинград кешесе, 146сы - элеккеге фашист концлагерьларының балигъ булмаган тоткыны; тагын 36949сы - тыл хезмәтчәне, 2416сы - шушы сугышта ирләрен югалткан тол. Казанда яшәгән 26 Советлар Союзы Героеның бүген нибары 3се генә исән: Сабир Әхтәмов, Борис Кузнецов, Петр Полушкин.

 Казан шәһәре Башкарма комитеты җитәкчесенең социаль мәсьәләләр буенча урынбасары Зөһрә Нигъмәтуллина биргән әлеге мәгълүматлардан билгеле булганча, сугыш ветераннарына хәзер 69 яшьтән алып 105кә кадәр. Ветераннарның иң өлкәннәреннән Бөек Ватан сугышы инвалиды Михаил Егоров Идел буе районында яши, тыл хезмәтчәне Таифә Хәруллова (105 яшь) - Яңа Савин районында.