Арчада сыер абзарында һәм бөртеклеләрне саклау урынында капиталь ремонт төгәлләнде
Агымдагы елда 232 сыер абзары, 64 машина-трактор паркы, 11 яшелчә һәм бәрәңге саклау биналарында капиталь ремонт планлаштырылган.
(Казан, 28 июль, “Татар-информ”). Арча районының Югары Бәрәзә авылында 100 башка исәпләнгән сыер абзарында һәм Курса Почмак авылында ябык амбарда капиталь ремонт эшләре тәмамланган. Бу хакта Татарстан Төзелеш, архитектура һәм торак-коммуналь хуҗалык министрлыгы матбугат хезмәтендә хәбәр иттеләр.
Ике объект та сыер абзарларын капиталь ремонтлау һәм силос-сенаж траншеяләре төзү буенча дәүләт программасы кысаларында ремонтланган.
Агымдагы елда 232 сыер абзары, 64 машина-трактор паркы, 11 яшелчә һәм бәрәңге саклау биналарында капиталь ремонт планлаштырылган.
Агымдагы елдан башлап бөртеклеләрне эшкәртү амбарларын капиталь ремонтлау программасы эшли башлады. Программа кысаларында 373, 2 млн сумга 128 амбарны ремонтлау планлаштырыла. Яңа программа бөртеклеләрне саклау шартларын яхшыртыр һәм товар сыйфатын саклар дип көтелә.