Арча педагогия көллияте командасы Россия чемпионы булды
Анапада һөнәри белем бирү оешмалары укучылары арасында II Бөтенроссия җәйге ГТО фестиваленең финалы узды.
(Казан, 20 сентябрь, "Татар-информ"). Арча педагогия көллияте командасы Анапада узган Бөтенроссия җәйге ГТО фестивалендә Россия чемпионы булды. Бу турыда Татарстанның Мәгариф һәм фән министрлыгы матбугат хезмәте хәбәр итте.
11-15 сентябрь көннәрендә Анапа шәһәрендәге "Смена" шифаханә-курорт берләшмәсе базасында һөнәри белем бирү оешмалары укучылары арасында II Бөтенроссия җәйге ГТО фестиваленең финал ярышлары узды. Ярышларны Россия Федерациясе Мәгариф министрлыгы һәм "Россия яшьләре" иҗтимагый-дәүләт физкультура-спорт берләшмәсе оештырды.
Фестивальдә Татарстан данын Габдулла Тукай исемендәге Арча педагогия көллияте командасы яклады. Ярыш нәтиҗәләре буенча көллият командасы беренче урынны яулады, диелгән әлеге хәбәрдә.