Арча районының Сикертән мәктәбендә Х районара Мөхәммәт Мәһдиев укулары узды
Арча районының Г.Камал исемендәге Сикертән мәктәбендә Х районара Мөхәммәт Мәһдиев укулары булып узды. Бу хакта «Казан утлары» журналының баш мөхәррир урынбасары Вакыйф Нуриев хәбәр итте.
Татарстанның халык язучысы, Г.Тукай исемендәге Дәүләт премиясе лауреаты Мөхәммәт Мәһдиев исеме белән бәйле бу бәйгегә Арча, Саба, Әтнә, Кукмара районнарыннан 85 эш килде. Алар дүрт юнәлештә каралды. Болар – «Авылым тарихы» (I-IV сыйныфлар), «М.Мәһдиев иҗатында җырлар» (V-VIII сыйныфлар), М.Мәһдиев иҗатында татар халык уеннары яки юмор» (IX-XI сыйныфлар), «М.Мәһдиев иҗатында Бөек Җиңүне якынайткан геройлар язмышы» (укытучылар өчен түгәрәк өстәл).
М.Мәһдиев укуларында җиңүчеләрне Казаннан кайткан кунаклар - Татарстанның халык шагыйре, «Язучы» нәшриятының баш мөхәррире Газинур Морат, язучы, «Казан утлары» журналының баш мөхәррир урынбасары Вакыйф Нуриев, М.Мәһдиевнең кызы, язучы-тәрҗемәче Гәүһәр Хәсәнова, М.Мәһдиевнең бертуган апасының кызы Җәүһәр Галимова, Арча муниципаль районы Мәгариф идарәсе җитәкчесе Нияз Муллахмәтов, методист Гөлназ Гыйндуллина, Гөберчәктәге М.Мәһдиев музее җитәкчесе Халидә Габидуллина һ.б. котлады. Мәктәп директоры Гөлназ Шәмсемөхәммәтова М.Мәһдиев укуларында катнашучыларга һәм кунакларга рәхмәт әйтеп чыгыш ясады. Сикертән мәктәбе укучылары әдипнең «Кеше китә - җыры кала» әсәреннән өзекләр уйнап күрсәтте, җыр-биюләрен ирештерде.