Арча районы Наласа авылында махсус операция хәрбиләре өчен өй токмачы әзерләгәннәр
Арча районы Наласа авылында яшәүчеләр махсус хәрби операциядә катнашучы якташлары өчен өй токмачы әзерләгән. Наласа мәдәният йорты директоры Ләйсән Лотфуллина сөйләгәнчә, мессенджерда авыл төркемендә белдерү язганнар: «Махсус хәрби операциядә катнашучыларга ярдәм итәргә теләүчеләрне 18 ноябрьдә мәдәният йортына токмач кисәргә чакырабыз».
«Язуын яздык, әмма уйга калдык: һәркемнең үз гаиләсе, үз мәшәкатьләре, теләүчеләр табылырмы икән. Биш минут та үтмәде, Миләүшә ханым он, капкачлы зур савыт, тоз алып килде. Аның җиңел кулы белән авылдашлар мәдәният йортына бер-бер артлы он, йомырка, әзер токмач алып килә башлады», - дип уртаклашты активист. Бу турыда «Татар-информ» яза.
Билгеләнгән көнне беренче булып Люция Закирова килгән, эшне ул башлап җибәргән. Аңа башка авылдашлары да кушылган. Күбесе он, йомырка алып килгән. Катнашучыларның берсе бер капчык он һәм утыз йомырка китергән. Ул исемен яшерен итеп саклауны сораган.
Авылда яшәүче хатын-кызлар икенче көнне дә җыелган. Шулай итеп, алар махсус хәрби операциядә катнашучылар өчен 30 контейнердан артык токмач әзерләгән.
«Бу игелекле эшкә өлеш керткәннәрнең барысын да санап бетереп булмый. Өй токмачы әзерләүдә катнашкан һәркемгә рәхмәт! Барыгызга да иминлек һәм тынычлык телибез», - диде Ләйсән Лотфуллина.
Татарстан Рәисе Рөстәм Миңнеханов ТР Дәүләт Советына еллык Юлламасында волонтерларга махсус хәрби операциягә ярдәм итүдә мөһим өлеш керткән өчен рәхмәт белдерде. «Кешеләр моны ихлас күңелдән һәм чын йөрәктән, үз тирәсенә шундый ук битараф булмаган гражданнарны берләштереп, фикердәшләреннән командалар җыеп эшли», - дип билгеләп үтте республика җитәкчесе.
- 2 сентябрьдән Татарстанда РФ Саклану министрлыгы белән контракт төзүчеләргә 2 миллион сумга кадәр акча түләнә. Түләүнең күләме арту республикада хәрби хезмәткәрләргә түләүләр арттырылу белән бәйле.
- РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны аша белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: 8 (843) 221 44 52. Моннан тыш, 8 (800) 222 59 00 номерына мөрәҗәгать итәргә була.