Апаста булачак солдатлар арасында иң көчлеләрне ачыкладылар
Апаста «Алга» яшүсмерләр клубында хәрби-гамәли спорт төрләре буенча республика спартакиадасы узды. Ярышларда Апас, Чүпрәле, Буа, Тәтеш, Кайбыч районнары командалары катнашты. Апас районы данын аграр көллият егетләре яклады. Бу хакта «Апастово-информ»нан Ләлә Сафиуллина хәбәр итә.
Егетләр пневматик винтовкадан атуда, противогаз киюдә, йөгерүдә, көч күнегүләрендә, турникта тартылуда, гер күтәрүдә, автоматны сүтү-җыюда, аркан тартышуда көч сынашты. Спартакиадада катнашучыларны «Алга» яшүсмерләр клубы җитәкчесе Илдар Салаватов сәламләде.
«Төп максат – яшьләрне армия хезмәтенә әзерләү дәрәҗәсен, аларның физик формаларын тикшерү», - диде ярышларның баш судьясы Марсель Хикмәтов.
Хәрби-гамәли спорт төрләре буенча республика ярышларында беренче урынны Чүпрәле районы егетләре яулады. Икенче урында – Апас һәм Буа егетләре. Өченче урынга Тәтеш районы командасы лаек булды.
Автоматны сүтеп җыюда аграр көллият студентлары Ленар Латыйповка һәм Илфак Мотыйгуллинга тиңнәр булмады. Алар 1 урынга лаек булды. Шулай ук Рамил Нигъмәтуллин да сынатмады. Ул икенче урынны яулады.