Апаста алдынгы комбайнчыларга премия бирделәр
Аларга бишәр мең сумлык кыр премияләре тапшырдылар.
(Апас, 22 август, "Татар-информ", "Апастово-информ", Ришат Җамалиев). Апаста алдынгы комбайнчыларны премия белән бүләкләделәр. Бу турыда район басмасы хәбәр итә.
20 августка “Нью Холланд-6090“ комбайннары белән урак башыннан 11000-13000 центнер ашлык суктырып алган район лидерлары - Наил Юнысов, Фирдүс Хәбибуллин, Илгиз Зиннуров.
Югары Балтай кырында эш төгәлләнгәч комбайнчылар колонна белән Дәвеш янындагы иген кырына күчкән вакытта өчесенә дә конвертка салынган бишәр мең сумлык кыр премияләре тапшырдылар.
"Шулай күңелне күреп торгач, эшкә дә күңел үсә. Быел Татарстан комбайнчылары марафонында да җиңәргә язсын иде", - диде Наил Юнысов.