Апас укучылары Муса Җәлил һәйкәленә чәчәкләр салдылар
Борынгы патефоннан Муса Җәлил шигырьләренә язылган җырлар яңгырады.
(Апас, 16 февраль, "Татар-информ", "Апастово-информ", Ришат Җамалиев). Апасның Туган як музеенда Советлар Союзы Герое, шагыйрь Муса Жәлилнең тууына 113 ел уңаеннан әдәби кичә уздырылды. Укучылар укытучылары белән бергәләп Апас үзәк китапханәсе каршындагы Муса Җәлил бюстына кызыл канәфер чәчәкләре салдылар. Бу турыда җирле басма хәбәр итә.
Апас мәктәбенең 6 сыйныф укучылары катнашында үткән бу очрашуда Муса Җәлилнең туганнары белән таныш булган китапханәче Даимә Тимеркәева үзенең хатирәләре белән уртаклашты.
Борынгы патефоннан Муса Җәлил шигырьләренә язылган җырлар яңгырады. Укучылар батырның тормыш юлын сүрәтләгән видеофильм-слайдлар белән таныштылар.
Музей директоры Рәмис Ногманов балаларга Муса Җәлилгә багышланган китаплар күргәзмәсе, шагыйрьнең тормыш һәм иҗаты турында сөйләде.
Бу көннәрдә Апас балалар китапханәсендә, авыл мәктәпләрендә дә шагыйрьнең туган көненә багышлап, шундый ук кызыклы чаралар, очрашулар һәм китап күргәзмәләре үткәрелә.