Җәмгыять 7 февраль 2017 05:00

Апас районының Кызыл Тау авылында яшәүче Назирә Кәримова 90 яшьлек юбилеен билгеләп үтте

Юбилярны район башлыгы урынбасары Марат Нуриев тәбрикләде һәм Ил башлыгы котлау хатын да тапшырды.

Скопировать ссылку

(Апас, 7 февраль, “Татар-информ“, “Йолдыз“, Гөлзада Гатауллина). Апас районының Кызыл Тау авылында яшәүче Назирә Кәримова тугызынчы дистәне ваклады, дип яза районның “Йолдыз“ газетасы.

– Заманасы шул иде, тормыш безне кыйный-кыйный бөтен эшкә өйрәтте. Шөкер, эштән кеше үлми. Хәрәкәт кирәк, хәрәкәт, – диде ул.

Ул сугыш чоры авырлыкларын күз яшьләре аша сөйләде. Бер төркем кыз мари урманында утын әзерли. Кул пычкысы белән юан-юан агачларны аударалар. Кырыс елларның аянычлы вакыйгалары җитәрлек була.

Тормыш иптәше белән алты бала тәрбияләп үстерәләр. “Бирде тормыш кирәкне, барысына да өйрәтте“ дип юкка гына кабатламый ул. 22 ел итек тә баса, дуңгызчылыкта да эшли. “Авылда гына түгел, тирә-якта да мин баскан итекне кимәгән кеше калмагандыр", – ди үзе.

Назирә Кәримова узган ел бер күзенә операция дә ясаткан, хәзер күзлексез генә инә саплый, гәҗит-журналлар да укый. Буадагы картлар йортына җылы оекбашлар да бәйләп җибәрә, ялгыз яшәүче авылдашларын да сөендереп тора.

Юбилярны район башлыгы урынбасары Марат Нуриев тәбрикләп, Ил башлыгының Котлау хатын, район башлыгы исеменнән истәлекле бүләк тапшырды.

#Апас #Йолдыз

Сәхифәләр

Апас районының Кызыл Тау авылында яшәүче Назирә Кәримова 90 яшьлек юбилеен билгеләп үтте