Апас районы башлыгы кыр хезмәтчәннәре белән очрашты
Икмәк язмышы өчен өлеш кертүче хезмәткәрләр барысы да үз эшләренең осталары һәм фидакарь хезмәт ияләре.
(Апас, 25 июль, "Татар-информ", "Йолдыз", Ләйлә Шигабиева). Апас районы башлыгы Рәшид Заһидуллин кырларда булып, җитәкче-белгечләр, механизаторлар белән очрашып сөйләште, мөһим мәсьәләләргә тукталды, хәер-фатихасын бирде, эшләрендә уңышлар теләде. Барлык кыр хезмәтчәннәренә дә “Апас“ язулы бейсболкалар бүләк итте. Бу турыда район басмасы хәбәр итә.
“Свияга“ агрофирмасының Дәүләки берләшмәсе, Дәвеш бүлекчәсенең 350 гектарлык арпа кырында 7 комбайн эшли.
"Барлык комбайннарга да икешәр комбайнчы билгеләнгән. Алар 24 сәгать кырда. Көндез турыдан-туры суктырып, ашлык кабул итү пунктына озатабыз. Төнлә алдан ектырганны чәчүлеккә суктырабыз. Гектарыннан 48 центнер уңыш чыга. Хезмәтчәннәр көнгә 4 тапкыр кайнар, сыйфатлы аш белән тәэмин ителә", – ди берләшмә идарәчесе Кәфил Гыймранов.
Икмәк язмышы өчен өлеш кертүче хезмәткәрләр барысы да үз эшләренең осталары һәм фидакарь хезмәт ияләре. Шәмәктә яшәүче Фирдүс Хәбибуллин комбайн руле артына утырып, бишенче урып-җыю эшләренә керешкән.
Иске Йомралы берләшмәсенең 213 гектарлык арпа кырында шулай ук эшләр оешкан төстә бара.