«Апанай» мәчете территориясендә Ураза гаетен бәйрәм иттеләр
Бүген Казанның Иске Татар бистәсендә урнашкан «Апанай» мәчете һәм мәдрәсә территориясендә Ураза гаете уңаеннан бәйрәм чарасы булды. Биредә дини-мәдәни программа, мастер-класслар әзерләнгән иде.
«Безнең «Апанай» мәчете территориясендә бик матур чара оештырылды. Мондый чаралар мөселман кардәшләребез өчен аеруча мөһим. Без әлеге бәйрәмне үткәрү белән динебезнең матурлыгын күрсәтәбез. Биредә төрледән-төрле бәйгеләр, мастер-класслар үткәрәбез. Милли киемнәр күргәзмәләре, ул киемнәр белән фотозона эшли», — дип сөйләде «Апанай» иман йорты имам-хатыйбы Нияз хәзрәт Сабиров «Татар информ»га.
Шулай ук әңгәмәдәш гарәп каллиграфиясе, читек тегү буенча мастер-класслар милләт, дин турында тәэссоратлар формалаштыруга булышуын ассызыклады.
«Без үзебезнең эш-гамәлләр белән милләтебезнең, динебезнең гүзәллеген балалар күңеленә дә җиткерәбез. Оештыру эшләрендә дәүләт органнары да һәрвакыт ярдәм кулын суза. Моны мәсәлән, префектура белән үткәрәбез. Ураза һәм Корбан гаетләре — мәчеткә барып намаз уку гына түгел. Ул — бер-беребезне шатландыру да», — дип өстәде Нияз хәзрәт Сабиров.
Чара барышында шулай ук мөнәҗәтләр яңгырады. «Апанай апайлары» төркеменең дин тәгълиматы, бала хакы турындагы мөнәҗәтләр белән чыгышлары кульминацион мизгел булды.
