Анталья татарлары 14 июльдә III Халыкара Сабантуйда катнашырга чакыра
14 июльдә 18:00 сәгатьтә Төркиянең Анталья шәһәрендә III Халыкара Сабантуй була. Милләттәшләребез милли чарага дөньядагы барлык халыкны да катнашырга чакыра.
«Сабантуйны Урта диңгез ярында «OLBIA KENT MEYDANI» мәйданчыгында үткәрергә ниятлибез. Сабантуйның махсус кунаклары – Татарстанның атказанган артистлары Фирдүс Тямаев, Нурзадә һәм Лилия Муллагалиева. «Анталия татарлары» оешмасы кунакларга күптөрле татар милли уеннарын, милли ризыкларын әзерләячәк. Шулай ук, бию номерлары кергән кызыклы концерт номерлары да көтелә», - дип сөйләде «Татар-информ» хәбәрчесенә «Анталья татарлары» оешмасы вәкиле Оксана Назарова.
Ул Сабантуйга барлык кешене көтеп калачакларын әйтте. «Без сезне дусларыгыз, гаиләләрегез белән елның иң көтеп алынган чарасына чакырабыз», – диде ул.
