Анкарада төрле илләрдән җыелган галимнәр татарларда армиягә озату йолалары белән танышты
Төркия башкаласы Анкарада үткән X халыкара төрки мәдәният конгрессында миләттәшебез, филология фәннәре докторы Чулпан Зариф-Четин «Татар халкында армиягә озату йолалары» дигән темага доклад белән чыгыш ясады. Бу хакта галимә үзе хәбәр итә.
Төркиянең Кавказ университеты профессоры Чулпан Зариф-Четин, Идел буе татарларында армиягә озату традициясенең күп гасырлык тарихын тикшереп, Россия җирлегендә армия хезмәтенең төрле дәверләргә караган үзенчәлекләрен анализлаган.
«Армиягә озату традициясе фәнни яктан тирәнтен тикшерелмәгән. Бу теманы өйрәнүемнең максаты - борынгы заманнардан алып бүгенге көнгә кадәр сакланып килгән армиягә солдат җибәрү традициясен тикшерү. Бу традиция кысаларында милли гореф-гадәтләрнең төп мәгънәләрен ачыклау һәм кайбер иске гореф-гадәтләрнең бүгенге көндә юкка чыгу сәбәпләрен аңлату», - ди галимә.
Ул фәнни тикшеренүендә күзәтү, сораштыру, анализ, чыгыштыру кебек ысуллар кулланган. Армиягә озату, армиядән каршылау белән бәйле кайбер гореф-гадәтләрнең төрек халкында да күзәтелүен белдерә.
Өч көн дәвам иткән X халыкара төрки мәдәният конгрессын Ататөрек исемендәге мәдәният үзәге идарәсе оештырган, анда төрле илләрдән 100дән артык галим чыгыш ясады.
