Татар дөньясы 1 июль 2005 12:29

Ана теле укытучысы һәм мәдрәсә мөгаллимәсе хаҗия Венера ханым Вахитовага “Мәшһүр милләтпәрвәр” таныклыгы тапшырылды

Скопировать ссылку

(Ульяновски, 1 июль, “Татар-информ”, Ләйлә Исламова). Ана теле укытучысы һәм мәдрәсә мөгаллимәсе хаҗия Венера ханым Вахитовага соңгы Сабантуй бәйрәмендә “Мәшһүр милләтпәрвәр” таныклыгы һәм акчалата бүләк тапшырылды. Ульяновскиның “Туган тел” оешмасы ел саен “Мәшһүр милләтпәрвәр” исеменә лаеклы милләттәшләребезне барлый һәм аларга беркадәр акчалата бүләк тә тапшырып килә. Алар арасында каһарман шәхес, шагыйрь һәм рәссам, Халыкара “Филантроп” премиясе һәм Гаяз Исхакый исемендәге премия лауреаты Гакыйль Сәгыйрев, “Айгөл” исемле сәнгать коллективы җитәкчесе, җырчы Әлфия Рамазанова, фидакарь зат, ана теле укытучысы Зөһрә Хәбибуллиналар да бар.

Бу исемне Венера ханым Вахитовага тапшырганда“Туган тел” идарәсе әгъзасы Розалия Матросова болай диде: “Мөхтәрәм Венера ханым! “Туган тел” оешмасы үтенечен кире какмыйча, бик яхшы эшегезне ташлап, мәчет бинасында ачылган мәктәп-мәдрәсәне җитәкләү эшенә алындыгыз. 7 ел буе, бөтен көчегезне куеп, бу изге эшкә хезмәт иттегез. Һәм нәтиҗәсе дә күзгә бәрелеп тора иде. Әмма, кызганыч, балаларның чын милли рухта тәрбияләнүен мәгариф түрәләре бугазга утырган таштай кабул итте һәм шуның нәтиҗәсендә мәдрәсә ябылды. Ләкин Сез укытып өлгергән балалар, чын милли һәм дини тәрбия алып, Сез күрсәткән юлдан бара һәм бүген дә Сез, өлкән яшьтә булуыгызга карамастан, халкыбызга иман нурын иңдерүдә армый-талмый эшлисез.

“Туган тел” оешмасы фидакарь хезмәтегез өчен тирән рәхмәтләрен белдереп, Сезне “2004 елгы Мәшһүр милләтпәрвәр” дип игълан итәргә карар кылды һәм кечкенә бүләк тә әзерләде.

Акчалата бүләкне бу чараның даими спонсоры “Туган тел” рәисе урынбасары Айрат Ибраһим тапшырды.

Сәхифәләр

Ана теле укытучысы һәм мәдрәсә мөгаллимәсе хаҗия Венера ханым Вахитовага “Мәшһүр милләтпәрвәр” таныклыгы тапшырылды