news_header_top_970_100
news_header_bot_970_100

Американың атаклы Мэйо клиникасы вәкилләре Казанда үз тәҗрибәсе белән уртаклашачак

Конференция ачылышында ТР Премьер-министры Илдар Халиковның катнашуы көтелә

 (Казан, 24 сентябрь, “Татар-информ”). Иртәгә Казанда ТР Премьер-министры Илдар Халиков катнашында “Дөньякүләм сыйфат стандарты: идеядән башлап тормышка ашуга кадәр. Мэйо клиникасы тәҗрибәсе” халыкара конференциясе ачылачак. Американың легендар клиникасы Мэйо мисалында медицина эшчәнлеге сыйфаты белән нәтиҗәле идарәне кору мәсьәләләренә багышланган конференцияне, Югары медицина технологияләре буенча белем бирү үзәге белән берлектә, ТР Сәламәтлек саклау министрлыгы оештырган.

Сыйфатлы, пациентларга йөз тоткан табиб ярдәме күрсәтү өлкәсендә дөньякүләм лидерлар Россиядә тәүге тапкыр тәҗрибәсе белән уртаклашырга һәм Россиянең сәламәтлек саклау администраторларына гамәли рекомендацияләр бирергә әзер. Конференциядә Россиянең барлык төбәкләреннән һәм БДБ илләреннән 1 меңнән артык кеше катнашачак.

Конференциядә экспертлар сыйфатында Mayo Clinic учреждениесенең медицина эшчәнлеге сыйфатын тәэмин итү мәсьәләләре буенча әйдәп баручы белгечләре – Сыйфат департаменты директоры Луэнн Лэнц, Хезмәтләр сыйфатын камилләштерү департаменты директоры җитәкчесе Тереза Венециале һәм клиниканың башка экспертлары чыгыш ясаячак.

Конференция Универсиада авылында урнашкан Идел буе физик тәрбия, спорт һәм туризм академиясенең уку-лаборатор корпусында узачак. Ул башланганчы, ТР сәламәтлек саклау министры Гадел Вафин һәм Америка делегациясе вәкилләре катнашында матбугат конференциясе оештырыла, дип хәбәр итә ТР Сәламәтлек саклау министрлыгының матбугат хезмәте.

 

 

 

news_right_column_1_240_400
news_right_column_2_240_400
news_bot_970_100