Америка мөгаллиме Президент аппараты хезмәткәрләрен инглиз теленә өйрәтәчәк
Укуны республика җитәкчесе Рөстәм Миңнехановның протокол хезмәте эшчеләре узачак.
(Казан, 12 июнь, “Татар-информ”, Алексей Угаров). Татарстан Президенты каршындагы дәүләт хезмәте һәм кадрлар департаменты КФУ белән берлектә Татарстан Президенты протокол хезмәтенең инглиз теленнән синхрон тәрҗемә итүче эшчеләренең квалификациясен күтәрү программасын башлады.
Дәресләрне АКШның биш президентында тәрҗемәче булып эшләгән Калифорниянең Монтерей институты мөгаллиме уздыра. Бу хакта “Татар-информ”га республика җитәкчесенең матбугат хезмәтендә хәбәр иттеләр.
“Татарстан Президенты Рөстәм Миңнеханов йөкләмәсе буенча, Казанда беренче тапкыр Президентның Дәүләт протоколы идарәсенең инглиз теленнән синхрон тәрҗемә белән шөгыльләнүче эшчеләренең квалификациясен күтәрү программасын башлый. Программаны КФУның Дәүләт һәм муниципаль идарә югары мәктәбе белән КФУ Халыкара мөнәсәбәтләр институты оештыра", - диделәр матбугат хезмәтендә.
Программа КФУның Халыкара мөнәсәбәтләр институты һәм Чит телләр югары мәктәбе хезмәткәрләрен укытуга да исәпләнгән.
Матбугат хезмәтендә әйтүләренчә, дәресләрне Калифорния штатындагы Монтерей халыкара тикшеренүләр институтының Язмача һәм телдән тәрҗемә итү югары мәктәбе мөгаллиме Андрей Фалалеев уздырачак.
Ул АКШ президентлары Джеральд Форд, Джимми Картер, Рональд Рейган, өлкән Джордж Буш һәм Билл Клинтоннарның эшлекле очрашуларында тәрҗемәче булып эшләгән. Монан тыш СССР президенты Михаил Горбачев һәм Россия президентлары Борис Ельцин һәм Владимир Путин белән дә эшләгән.