«Алтын мөнбәр» Казан халыкара кинофестивалендә катнашачак фильмнар исемлеге билгеле
«Алтын мөнбәр» XXI Казан халыкара кинофестиваленең шорт-листы формалаштырылган. Дүрт номинациядән торган төп конкурска Татарстанга бәйле өч фильм кергән.
«Тулы метражлы нәфис фильм» номинациясендә Радик Кудояровның Россия-Германия копродукциясе итеп күрсәтелгән «Карурман»ы бар. «Документаль фильм» номинациясенә Бай Хәйруллинның «Казан җөе» фильмы кергән. «Анимацион фильм» номинациясендә Элина Абызованың «Сквозь ресницы» фильмы.
Шулай ук 10 фильм кергән «Милли конкурс» номинациясе бар. Биредә Татарстан кинематографистлары эшләре тәкъдим ителә. Алар арасында Ренат Сайганың «Авантюристы», Юлия Захарова белән Ирек Хафизовның «Әниләр һәм бәбиләр», Александр Далматовның «Кеше китә – җыры кала» һәм «Мансур Җәләлетдин» фильмнары, Фирдания Хөснетдинованың «Мой любимый пророк», Наталья Нилованың «Туган батыр» һәм башка фильмнар бар.
- Форумның конкурс программасына барлыгы 50 фильм кергән.
- Оештыру комитетына 67 илдән 845 гариза килгән.
- Кинофестиваль 5-9 сентябрь көннәрендә үтә.