«Алтын каләм» бәйгесенең финалы 75 катнашучыны берләштерде

Бүген Казан янындагы «Идел» яшьләр үзәгендә «Алтын каләм» XXVIII Республика фестивале финалы башланды. Анда Татарстанның 19 шәһәре һәм районыннан 75 журналист катнаша, дип хәбәр итә ТР Яшьләр эшләре министрлыгының матбугат хезмәте.

Конкурсантлар рус һәм татар телләрендә басма журналистика, подкастлар һәм радио, фотожурналистика, телевидение һәм видеоблогинг, дизайн һәм верстка, SMM, реклама һәм җәмәгатьчелек белән элемтә юнәлешләре буенча ярыша. Фестиваль кысаларында беренче тапкыр студент медиаүзәкләре өчен махсус категория каралган.

Ачылыш тантанасында «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев, ТР яшьләр эшләре министры урынбасары Айгөл Сабирова, фестивальнең жюри рәистәше - ТР Дәүләт Советы депутаты Римма Ратникова, конкурсантларның алыштыргысыз остазы - Россиянең атказанган артисты Лия Заһидуллина, «Шаян ТВ» телеканалының башкарма директоры һәм баш мөхәррире Рамилә Сәхәбетдинова һәм Абхазиянең «Апснымедиа» телерадиокомпаниясе генераль директоры Роберт Джопуа катнашты.

«Без сезнең белән фестиваль кысаларында инде ярты ел аралашабыз: лекцияләр, мастер-класслар һәм танылган журналистлар белән очрашулар үткәрәбез. Дөнья үзгәрә һәм үсә, трендлардан артта калмаска һәм өйрәнергә кирәк - без катнашучылар өчен нәкъ менә белем бирү мохите булдырырга тырышабыз. Барыгызга да уңышлар һәм зур җиңүләр телим», - дип белдерде Айдар Сәлимгәрәев.

Римма Ратникова фестивальне оештыручылар аның шундый кирәкле проектка әверелүен хәтта күз алдына да китермәвенә игътибар юнәлтте. «Без медиа даирәсендә кадрлар кытлыгы турында беренче тапкыр гына сөйләмибез. Фестивальдә сез үзегезнең иң яхшы талантларыгызны ача аласыз, зинһар, моны эшләргә тырышыгыз! Журналистиканы күзәтегез, бу һөнәрнең сезгә кирәкме-түгелме икәнен бәяләгез. Ә журналистика сезгә игътибар итәчәк һәм сезнең сәләтләрегезне бәяләячәк», - дип өстәде парламентарий.

Айгөл Сабирова үз чыгышында чараның форматы үзгәрүен әйтте, быел конкурсантларның онлайн-этаплар һәм күчмә лекция кысаларында белем алуын искәртте. «Иң мөһиме - фестивальнең тарихы. Буыннар алмашынуы журналистлар белән ничек эшләргә кирәклеген күрсәтә: өйрәтергә һәм үсеш өчен мөмкинлек бирергә», - диде министр урынбасары.

Фестивальдә катнашучыларны биш көн дәвамында танылган журналистлардан һәм медиаөлкәнең башка белгечләреннән лекцияләр һәм мастер-класслар, опен-токлар һәм гаммәви мәгълүмат чаралары вәкилләре белән форсайт-сессияләр, дәресләр көтә. Яшь медиа хезмәткәрләре рус һәм татар телендә журналлар чыгарачак, подкастлар, радиоэфирлар һәм телетапшырулар әзерләячәк, чараның социаль челтәрләрен алып барачак һәм PR-проектлар эшләячәк. Югары һәм махсус урта уку йортларының медиа үзәкләре үз коммуникация каналларында контент-планнарны гамәлгә ашыра.

Фестивальнең финалы һәм моннан алдагы этаплары нәтиҗәләре буенча Гран-при ияләрен билгелиләр - алар югары уку йортында медиаюнәлеш буенча белем алу өчен сертификатлар алачак. Моннан тыш, юнәлешләр буенча I, II һәм III дәрәҗә лауреатлар, «Ел ачышы» номинациясендә һәм башка махсус номинацияләрдә җиңүчеләр сайлана. Югары һәм махсус уку йортлары арасында иң яхшы медиаүзәкләрне 1 миллион сумлык сертификатлар көтә.

• «Татар-информ» агентлыгы элегрәк хәбәр иткәнчә, «Алтын каләм» XXVIII Республика яшүсмерләр һәм яшьләр матбугаты фестиваленә 308 гариза тапшырылган. Онлайн һәм офлайн-этапларда конкурсны 118 катнашучы узган. Казан шәһәре, Арча, Әлмәт, Актаныш һәм Түбән Кама районнары, шулай ук Чаллы вәкилләре иң зур активлык күрсәткән.