Әлмәттә шәһәр күлен төзекләндерү тәмамланды
Әлмәттә шәһәр күлен төзекләндерү тәмамланды, ул ике этапта үтте. Әлмәт районы башлыгы Тимур Нагуманов Татарстан шәһәрләрен үстерү институты командасы белән бергә әлмәтлеләр яраткан иҗтимагый киңлекне тикшерде. Бу хакта «Әлмәт таңнары» хәбәр итә.
Башта шәһәр күле 2016 елда су саклау зоналары елы кысаларында төзекләндерелә. Зур эш башкарыла: пляж төзекләндерелә, төрле активлык зоналары барлыкка килә. Пляж шәһәр халкының да, аның кунакларының да актив ял итү урыны булып тора.
Искәртик, Әлмәт шәһәр күле пляжы республиканың барлык хезмәтләрдән, шул исәптән Роспотребнадзордан да, ял итүчеләрне кабул итү өчен рөхсәт алучы 53 пляжы исемлегенә керә.
Узган ел күлне Шевченко һәм Болгар урамнары ягыннан төзекләндерү турында карар кабул ителде. Икенче чиратта белгечләр гранит брусчатка җәяләр, бордюр таш урнаштыралар, кечкенә архитектура формаларын урнаштыралар һәм Шевченко — Болгар урамнары киселешендә керү зонасын төзекләндерәләр.
Хәзерге вакытта җәяүлеләр юллары буйлап урам яктырту челтәрләрен һәм коймны монтажлау, видеокүзәтү системасын урнаштыру тәмамлана.
Шәһәр күлен яңарту «Торак һәм шәһәр мохите» илкүләм проекты ярдәмендә узды.