Әлмәттә «Авантюрист» тулы метражлы фильмы төшереләчәк
Җәй көне Әлмәт шәһәрендә «Авантюрист» тулы метражлы фильмы төшереләчәк. Бу сценарист Андрей Румянцевның криминаль комедиясе. 2009 елда ул Безруков һәм Дюжев белән «Каникулы строго режима» фильмын төшерүдә катнашкан. Бу хакта «Әлмәт таңнары» хәбәр итә.
Фильм өстендә режиссер-башкаручы Ренат Сайга эшләячәк. Аның исәбендә ике кыска метражлы фильм, ул 7 халыкара кинофестивальдә катнаша, ике халыкара кинофестиваль лауреаты була. Соңгы эше өчен 2021 елда Әфганстанда режиссер «иң яхшы чит ил фильмы» номинациясендә приз алды.
Профессиональ актерлар кастингы Мәскәүдә, Казанда һәм Әлмәттә апрель-май айларында үткәреләчәк. Фильмда 65тән артык персонаж катнашачак, алар арасында шулай ук 6 яшьтән 12 яшькә кадәрге балалар сайлап алыначак. «Авантюрист» фильмын төшерү 2024 елның июнь-июлендә планлаштырыла.