Әлмәтнең балалар һәм яшүсмерләр иҗаты үзәге 70 еллык юбилеен билгеләп үтте
Әлмәтнең балалар һәм яшүсмерләр иҗаты үзәге шушы көннәрдә үзенең 70 еллык юбилеен билгеләп узды. Бу чын мәгънәсендә уникаль урын, чөнки нәкъ менә биредә күп еллар дәвамында үсеп килүче буынның талантлары ачыла. Бу хакта «Әлмәт таңнары»нда Резедә Исмәгыйлева хәбәр итә.
Үзәк 1954 елда ачылган һәм шушы еллар дәвамында берничә тапкыр исемен үзгәртә, әмма аның максаты шул ук кала – бу балаларга иҗат, спорт, фән юнәлешләрендә үз осталыкларын камилләштерергә ярдәм итү.
Бүгенге көндә биредә 2меңнән артык бала 166 укыту төркемендә шөгыльләнү мөмкинлегенә ия. Балалар һәм яшүсмерләр иҗаты үзәгенә йөрүчеләр республика һәм Россия күләмендә уздырылган бәйгеләрдә һәрдаим катнашып җиңү яулый. Татарстанда бердәнбер булган балаларның техник иҗаты музее да шушы үзәктә урнашкан. Монда шулай ук Пионерия музее да эшли.
Шушы ук елның августында «Табигать йорты» да ачылды. Бу инде үсеп килүче буынны экология һәм биология фәннәре белән кызыксындыру максатыннан оештырылган иде. Иҗат үзәгендәге бассейнны да шәһәрдә һәм районда белмәгән кеше юктыр, мөгаен. Биредәге театраль студияләрне, иҗади сменаларны санап бетерә торган түгел.
«Балаларның һәм яшүсмерләрнең сәләтләрен үстерүгә шәһәрнең иң талантлы педагоглары үз өлешләрен кертә. Балалар һәм яшүсмерләр иҗаты коллективын юбилейлы дата белән котлыйбыз һәм тату коллективка алга таба да уңышлы эшчәнлек теләп калабыз», – диелгән хәбәрдә.