Әлмәт хастаханәсендә студентларны VR-тренажерларда операция ясарга өйрәттеләр
Әлмәт районара күппрофильле хастаханәсендә 6чы курс студентлары һәм икенче елын укучы ординаторы операцияләр уздыруга әзерләнә. Моның өчен медицина учреждениесе диварларында махсус симуляцион класс булдырганнар. Бу хакта «Әлмәт таңнары» яза.
Анда виртуаль симуляторлар урнаштырганнар. Алар лапароскопик, эндоскопик һәм эндоваскуляр операцияләр үткәргәндә күнекмәләрне үзләштерү, шулай ук утратавыш диагностикасы өчен каралган. Бу хакта Әлмәт күп профильле хастаханәсе матбугат хезмәте хәбәр итә.
Кафедра мөдире Илдус Мостафин сүзләренчә, кадрлар кытлыгы шартларында яшь белгечләрне Татарстанның көньяк-көнчыгышындагы хастаханәгә һәм дәвалау учреждениеләренә җәлеп итәргә һәм беркетергә кирәк.
«Безгә укырга студентлар һәм ординаторлар килсен өчен мөмкин кадәр уңайлы шартлар тудырырга кирәк. Яшь коллегаларны укытуга безнең клиниканың зур эш тәҗрибәсе булган белгечләрен, шулай ук башка дәвалау учреждениеләре укытучыларын җәлеп иттеләр», – диде Мостафин.
Кафедра мөдире чыгарылыш сыйныф укучыларының төбәктә калачагына һәм республика файдасына эшләячәгенә ышаныч белдерде.