Әлки районы мөселманнарына чаңгы ярышында истәлекле бүләкләр тапшырылды
19 февральдә Әлки районы мөхтәсибәте һәм Бөтендөнья татар конгрессы мөселман яшьләре арасында чаңгы ярышлары уздырды.
Иң элек чаңгы ярышында катнашучыларны район башлыгы урынбасары Рәшит Билалов, мөхтәсиб Ирек хәзрәт Сәләхиев сәламләде. Бу хакта «Әлки хәбәрләре» сайтында хәбәр ителә.
Әлки кешесе, Бөтендөнья конгрессы башкарма комитетының милли мәгариф һәм мәдәният комитеты җитәкчесе Зөфәр Вәлиәхмәтов туган районында шундый бәйге оештыру нияте белән чыккан. Район мөхтәсибәте, спорт мәктәбе ярышны актив ял рухында оештырырга алынган.
Чаңгы юлларында ир-егетләр, хатын-кызлар, балалар үзләренең физик мөмкинлекләрен күрсәтеп, төрле ераклыкка чаңгыда узышты. Иң осталар һәм җитезләргә дипломнар, медальләр, истәлекле бүләкләр тапшырылды.
Базарлы Матак мөселман яшьләре спорт бәйрәмендә кайнар чәйләр кайнатып, өчпочмак, күмәчләр белән һәркемне сыйлады.