Җәлил бистәсендә «Эверест» балалар мәдәни-агарту үзәге ачылды
Җәлил бистәсендә «Эверест» балалар мәдәни-агарту үзәге ачылды. Үзәкнең исеме дөньядагы иң биек тау белән бәйле. Бу исем очраклы гына сайланмаган. Монда һәр бала үз максатына, үз югарылыгына ирешер, дигән өмет бар. Ә үзәк, үз чиратында, балага кирәкле белем һәм күнекмәләр алырга һәм үз көченә ышанырга ярдәм итә. Бу хакта «Сарман-информ» хәбәр итә.
Үзәк «Гаилә» илкүләм проектының «Гаилә кыйммәтләре һәм мәдәният инфраструктурасы» федераль проекты ярдәмендә булдырылды. 2026 ел ахырына кадәр Бөтен Россия буенча 75 төбәктә 300 шундый үзәк ачарга планлаштыралар.
Җәлил мәдәният сарае Бөтенроссия сайлап алу үтте һәм балалар өчен мәдәни-агарту пространствосы булдыруга грант алган учреждениеләр арасына керде.
Фото: © «Сарман-информ»
Ачылу тантанасында Сарман районы башлыгы Фәрит Хөснуллин, Азнакай районы башлыгы Марсель Шәйдуллин, «Татарстан Республикасы мәдәният өлкәсендә инновацияләрне кертү һәм традицияләрне саклау ресурс үзәге» директоры Алсу Мифтахова, Татарстан Республикасының «Республика яшүсмерләр китапханәсе» дәүләт бюджет мәдәният учреждениесе директоры Наилә Вәлиуллина һәм Җәлил бистәсе башлыгы Рәфыйк Кәримов катнашты.
Шул ук көнне тантаналы шартларда Татарстан Республикасының Электрон мактау тактасы лауреатларын бүләкләделәр.
Тантанадан соң кунаклар «Эверест» балалар үзәгендә булдылар. Алар кызыл тасманы кистеләр һәм иҗади зоналарны карадылар. Проект җитәкчесе Александр Фәрхетдинов үзәкнең мөмкинлекләре һәм аны алга таба үстерү планнары турында сөйләде.