Алексей Песошин Татарстанда төзелеш, төзекләндерү эшләре турында сөйләде

(Казан, 28 август, "Татар-информ", Гөлнар Гарифуллина). Татарстанда гамәлгә ашырыла торган республика программалары кысаларында төзелеш, төзекләндерү эшләре турында бүген журналистларга Министрлар Кабинетында брифингта ТР Премьер-министры Алексей Песошин сөйләде.

Ул 2018 елның 8 ае эчендә 72 күп катлы торак йорт төзелгәнен әйтте. Аларның мәйданы 561 мең квадрат метр. Гомуми мәйданы 621,4 мең квадрат метр булган 4 мең 970 аз катлы индивидуаль торак төзелгән. Социаль ипотека һәм арендалы торак программалары буенча 2 мең 893 фатир кулланышка кертелгән. Мәйданы 158,5 мең квадрат метрга якын.

Хөкүмәт башлыгы әйтүенчә, 65 универсаль спорт мәйданчыгы, 6 чаңгы базасы сафка баскан. 4 авыл клубы төзелгән, тагын 24ен төзү дәвам иттерелә. 41 фельдшер-акушерлык пункты, 11 табиб амбулаторие төзелә. 10 авыл җирлекләре башкарма комитетлары бинасы пәйда булачак. "14 муниципаль мәктәп капиталь төзекләндерелгән, тагын 2 объектта эшләр тәмамлану алдында. 7 коррекцион мәктәптә эшләр төгәлләнеп килә. 61 балалар бакчасы төзекләндерелә, 33ендә эшләр дәвам итә. 15 балалар сәламәтләндерү лагере, 21 яшүсмерләр клубы (7 объектта эш дәвам иттерелә), 1 яшьләр үзәге, 2 ресурс үзәге әзер, 9 объектта эшләр дәвам иттерелә", - дип сөйләде Песошин.

Аның сүзләренчә, 17 муниципаль архив бинасына ремонт ясалган, 2 объектта эшләр бара. Мәдәни билгеләнешле 19 объект төзекләндерелгән, 23е тәмамлану стадиясендә. 14 социаль хезмәт стационар оешмасында эшләр азагына якынлашкан, 20 объектта эшләр алып барыла. Төзекләндерү эшләре тәмамланган 5 амбулатор-сырхауханә учреждениесе исәпләнә, 101 объектта эшләр бүгенгәчә дәвам итә. "Һәркемгә уңайлы мохит" программасы буенча 5 объект үзгәртеп корылган, 20 объектта эшләр төгәлләнеп килә. Авыл хуҗалыгы идарәләре һәм ветеринария берләшмәләрнең 45 бинасы ремонтланган.

Ашыгыч медицина ярдәм станциясе һәм хастаханәләрнең 2 объектында, 31 башкарма комитет бинасында эшләр үткән. 2018 ел программасына кертелгән 995 күп фатирлы торак йортта капиталь ремонт дәвам иттерелә. Аларның үтәлеше бүген 42-43 процент тәшкил итә. 11 Бөек Ватан сугышы ветераны, 5 һәм аннан күбрәк бала үстерүче 26 күп балалы гаилә, 64 ятим бала яшәү шартларын яхшырткан.

Аерым категория гражданнарын торак белән тәэмин итүгә 93 млн сумнан артык суммага 47 субсидия бирелгән.