Алексей Созинов: Күп балалы гаиләләрнең сайлау хокукы бар - җир яки акча алу

Казан һәм Чаллыдагы күп балалы гаиләләргә бушлай җир кишәрлеге яки акчалата түләү алу мөмкинлеге бирелде. Бу хакта бүген ТР Дәүләт Советының Социаль сәясәт комитеты рәисе Алексей Созинов журналистларга белдерде.

«Инде күп еллар гамәлдә булган ярдәм чарасы – җир кишәрлекләре бүлеп бирү. Ә бу мәсьәләне альтернатив хәл итү мөмкинлеге бирә торган норма барлыкка килү – теләсә кайсы күп балалы гаилә өчен искиткеч мөмкинлек. Бу чара бик позитив буларак кабул ителде. Сайлау хокукы бар – акчалата компенсация алу яки җир кишәрлеге алу өчен гариза бирү», - диде ул.

Депутат билгеләп үткәнчә, күп балалы гаиләләр җир кишәрлеге урынына ала алачак акчалата түләү күләмен хәзер ТР Хөкүмәте билгели. «Бу күп балалы гаиләләргә торак шартларын яхшыртуга ярдәм итәчәк сизелерлек акча суммасы булачак. Бу теләсә кайсы гаилә өчен яхшы акча», – диде ул.

Созинов билгеләп үткәнчә, Татарстанда 800 меңгә якын күп балалы гаилә яши. Әмма, аның сүзләренчә, барлык муниципаль берәмлекләрдә дә, бигрәк тә Казанда һәм Чаллыда, аларга җир кишәрлекләре табу мөмкинлеге юк.

Парламентарий билгеләп үткәнчә, тулаем республика буенча күп балалы гаиләләрнең участоклар белән тәэмин ителеше аларның гаризалары буенча 75 проценттан артык тәшкил итә. «Ягъни дүрт гаиләнең өчесе ала. Әмма Казанда һәм Чаллыда – бу 50 проценттан да кимрәк», – дип ачыклык кертте ул.

Созинов шулай ук искә төшергәнчә, Россиядә балалы гаиләләргә социаль ярдәм чаралары күп – бер тапкыр бирелә торган һәм даими түләүләр, пособиеләр, ана капиталы һ.б. гамәлдә.

«Белем алу белән бәйле чаралар бар. Мәсәлән, күп балалы гаиләләрдәге балаларга һөнәри белем бирү чыгымнарының бер өлешен компенсацияләү. Күп балалы гаилә төшенчәсе хәзер бөтен ил өчен билгеләнгән бердәм критерийга ия - 23 яшькә кадәрге өч бала, көндезге һөнәри белем яки югары белем алучыларны да кертеп», - дип йомгаклады ул.

25 сентябрьдә ТР Дәүләт Советы утырышында депутатлар ТР Җир кодексына үзгәрешләр кертүче закон проектын кабул итте. Документ нигезендә, Казанда һәм Чаллыда даими яшәүче күп балалы гаиләләргә җир кишәрлеге урынына аларның ризалыгы белән акчалата түләү биреләчәк.

Җирле үзидарә органнарында үзләренә тиешле кишәрлекләр белән тәэмин ителмәгән 27,5 меңнән артык күп балалы гаилә исәптә тора. Мондый гаиләләрнең күбесе Казанда (8,5 меңнән артык) һәм Чаллыда (5,3 меңнән артык) яши.