Алексей Песошин: Илкүләм проектларның үтәлми калу куркынычы юк

«Татарстан 2022 елда илкүләм проектларны гамәлгә ашыру буенча үзенә алган барлык бурычларны үтәячәк», - диде Премьер-министр.

Скопировать ссылку

Татарстан Премьер-министры Алексей Песошин сүзләренчә, республикада илкүләм проектларны гамәлгә ашыруда куркыныч янаган сәбәпләр юк. Бу хакта ул Татарстан Дәүләт Советының 31 нче утырышында депутат Азат Җиһаншин соравына җавабында әйтте.

«Татарстан 2022 елда илкүләм проектларны гамәлгә ашыру буенча үзенә алган барлык бурычларны үтәячәк, ниндидер эшләрдә яки тәэмин ителештә өзеклекләр туар дигән куркыныч юк», - дип белдерде Алексей Песошин.

«Илкүләм проектлар үтәлешендә куркыныч күрмим. Без күбрәк акчалар кулланып эшләгән эшләр дә бар. Быел илкүләм проектларга 29,4 млрд сум акча бүленгән, шуның 19,1 млрд сумы – федераль өлеше. Барлыгы 148 чара каралган», - дип билгеләп үтте Премьер-министр.

Ул илдә кризиска каршы чаралар пакеты кабул ителгәнен искәртте. «Алар бәяләргә төзәтмәләр кертеп, дәүләт заказлары кысаларында башка төр җиһазларга күчәргә мөмкинлек бирә. Шул рәвешле, заказчыларда һәм поставщикларда үз бурычларын үтәүдә яңа мөмкинлекләр барлыкка килә», - диде.

Бүген Алексей Песошин парламент утырышында депутатлар каршында Хөкүмәтнең 2021 елгы эшчәнлеге турында хисабы белән чыгыш ясады.

Сәхифәләр

Алексей Песошин: Илкүләм проектларның үтәлми калу куркынычы юк