Алексеевск районында «Лада» машинасы кюветка төшеп киткән, ике кеше үлгән
Скопировать ссылку
Алексеевск-Биләр автомобиль юлында үлемгә китергән юл-транспорт һәлакәте булган. Бу хакта ТР прокуратурасы хәбәр итә.
Якынча мәгълүматларга караганда, бүген 6:30 сәгать тирәсендә Алексеевск-Биләр автоюлының 14нче чакрымында «Лада Гранта» автомобиле йөртүчесе идарә итүне башкара алмаган һәм кюветка төшеп киткән. Җиңел машинаның 29 яшьлек йөртүчесе һәм 24 яшьлек пассажир урында ук үлгән.
Фото: © ТР прокуратурасы
Автомобильдә барлыгы дүрт олы кеше һәм ике балигъ булмаган бала булган. Исән калучыларны ашыгыч ярдәм табиблары алып киткән.
Килеп чыккан хәлнең сәбәпләре һәм шартлары ачыкланачак. Прокуратура тикшерү эшен башлады.