Җәләлетдинов: Хәрбиләр «Батырлар» программасы буенча Ватан файдасына эшләвен дәвам итәчәк
«Батырлар» – яхшы программа, дип кенә әйтү – берни дә әйтмәгән кебек, алгы сызыктагы хәрбиләр дә шулай ди. ТР мөфтиенең махсус хәрби операциядә катнашучылар һәм аларның гаиләләренә ярдәм итү мәсьәләләре буенча урынбасары Мансур хәзрәт Җәләлетдинов «Татар-информ» агентлыгына шундый фикерләрен белдерде.
Искәртеп үтәбез, «Батырлар. Татарстан Геройлары» программасы республика Рәисе Рөстәм Миңнеханов инициативасы белән Россия Президенты Владимир Путин күрсәтмәсе нигезендә гамәлгә ашырыла. Асылда, Татарстан программасы «Геройлар вакыты» федераль программасының төбәк варианты булып тора.
«Мин алгы сызыктагы егетләр янына еш барам. Луганск, Донецк, Курск, Мариупольдә булдым, хәрбиләр белән аралаштым. Аларның сүзләре буенча моның бик яхшы программа булуын аңладым. Без Казанда тыныч халык кебек яшибез, ә аларның барысы да башкача. Без монда башка үлчәнештә гомер итәбез кебек. Ә андагы егетләр – чын ватанпәрвәрләр, алар Ватаныбызны саклый, аларда бердәмлек һәм команда рухы бар. Алар ялгыша алмый, чөнки һәрбер хата бик катлаулы нәтиҗәләргә китерергә мөмкин», – диде ул.
Ул билгеләп үткәнчә, киләчәктә хәрбиләр махсус операция зонасыннан кайткач һәм бу программа буенча белемнәрен ныгыткач, үз патриотизмын башка кешеләргә дә тапшырачак.
«Андагы вазгыять чын ир-ат холкы тәрбияли. Алар кан койды, үзләрен кызганмыйча Ватанны саклады – бу егетләргә таянырга мөмкин. Егетләрнең кайберләре контракт буенча киткән, кемдер мобилизациягә эләккән, һәм анда илебез мәнфәгатьләрен яклыйлар. Аларны билгеле бер аспектлар буенча өйрәтергә кирәк, ягъни кемнедер мәгариф линиясе буенча, кемнедер икътисад һәм финанс өлкәсендә яки, мәсәлән, төзелеш тармагында. Иң мөһиме, егетләр анда Ватан азатлыгы хакына үз гомерләрен бирергә әзер иде. Алар өйләренә кайткач та Россия файдасына эшләвен дәвам итәчәк», - дип өстәде Мансур хәзрәт Җәләлетдинов.
Ул билгеләп үткәнчә, Бөек Ватан сугышыннан кайткан кешеләр завод-фабрикалар салган һәм яңадан ачкан, пароходлар төзегән, машина төзелеше һәм башка тармакларны үстергән.