Алабугада заманча сәнгать буенча ХIХ Халыкара арт-симпозиум була
15-25 июльдә Алабуга дәүләт музей-тыюлыгында заманча сәнгатькә багышланган «Озын-озак балачак» темасына ХIХ Халыкара арт-симпозиум узачак. Ул Россиядәге Гаилә елына багышлана. Чара Татарстан Мәдәният министрлыгы ярдәме белән уздырыла. Бу хакта министрлык сайтында хәбәр ителә.
Мондый чаралар уздыру «Мәдәният» илкүләм проектының «Иҗат кешеләре» федераль проекты максатларына һәм бурычларына туры килә.
Симпозиум тематикасы дөньядагы төрле халыкларның милли гореф-гадәтләренең сәнгати чагылышын Россиянең төрле төбәкләрендә һәм башка илләрдә яшәүче рәссамнар иҗаты ярдәмендә ачуны үз эченә ала. Эшләр рәсем сәнгатенең, графика һәм декоратив-гамәли сәнгатьнең традицион һәм авторлык техникаларында башкарылачак.
2024 елгы проектта Россиядән (шул исәптән яңа төбәкләрдән дә), Беларусь, Кытай һәм Төркиядән 37 рәссам катнаша.
Симпозиумда катнашучылар өчен мастер-класслар була. Моннан тыш, «Сәнгать – җитлегеп бетмәгән балачак» темасына түгәрәк өстәл дә була, анда Төркиядән килгән сәнгать белгече Исмаил Эрдоган чыгыш ясаячак.
Проект ахырында билгеләнгән темага уникаль әсәр булдырачаклар һәм аны мәҗбүри рәвештә Россия Музей фондын тулыландыру өчен Алабуга дәүләт музей-тыюлыгы фондына тапшырачаклар. «Озын-озак балачак» темасына ХIХ Халыкара арт-симпозиумында катнашучыларның эшләреннән күргәзмә 24 июльдә ачыла.